యెమెన్‌కు చెందిన హూతీలు సౌదీ అరేబియాలోని విమానాశ్రయాలు, చమురు క్షేత్రాలపై దాడులు చేయడంతో వందలాది మంది ఉమ్రా యాత్రికులు అక్కడే చిక్కుకుపోయారు. వీరిలో సుమారు 3,000 మంది అందుబాటులో ఉన్న విమానాల్లో గత వారం రోజుల్లో భారత్‌కు తిరిగొచ్చారని విదేశాంగ శాఖ అధికార ప్రతినిధి రణ్‌ధీర్ జైస్వాల్ గురువారం తెలిపారు. ఇదే సమయంలో మరో 10,000 మందికి పైగా ముందే బుక్ చేసుకున్న విమానాల్లో వచ్చారని చెప్పారు.
మిగిలినవారి సంగతి
మిగిలిన యాత్రికులను వీలైనంత త్వరగా రప్పించే ఏర్పాట్లపై చర్చలు జరుగుతున్నాయని విదేశాంగ శాఖ తెలిపింది. రియాద్‌లోని భారత రాయబార కార్యాలయం, జెడ్డాలోని కాన్సులేట్ విమానయాన సంస్థలు, టూర్ ఆపరేటర్లతో కలిసి పనిచేస్తున్నాయని, 24 గంటల కంట్రోల్ రూమ్‌లు ఏర్పాటు చేశాయని చెప్పింది. మక్కా, మదీనాల్లో సుమారు 4,000 మంది చిక్కుకుపోయారని, ప్రత్యేక విమానాలు నడపాలని హైదరాబాద్ ఎంపీ అసదుద్దీన్ ఒవైసీ ఇంతకుముందు కేంద్రాన్ని కోరారు.
హైదరాబాద్, కడప యాత్రికులు
తమ ఏజెన్సీ ద్వారా వెళ్లిన ముగ్గురు యాత్రికుల్లో ఒకరు హైదరాబాద్‌కు, ఇద్దరు కడపకు చెందినవారని హైదరాబాద్‌కు చెందిన ట్రావెల్ కోఆర్డినేటర్ కరీం చెప్పారు. వారికి జెడ్డాలో సురక్షిత వసతి ఏర్పాటు చేసి అవసరాలు చూసుకుంటున్నామని, విమానాలు మొదలవగానే వెనక్కి తీసుకొస్తామని అన్నారు. దమ్మామ్ విమానాశ్రయంపైనా దాడి జరగడంతో అక్కడి నుంచి టికెట్లు దొరకలేదని తెలిపారు. ఉమ్రా యాత్రలను ప్రైవేటు టూర్ ఆపరేటర్లే నిర్వహిస్తారు కాబట్టి ఈ వ్యవహారంలో తమ పాత్ర లేదని తెలంగాణ హజ్ కమిటీ అధికారి ఒకరు చెప్పారు.
సహాయ నంబర్లు
- రియాద్ రాయబార కార్యాలయం: +966-554412016, +966-542126784; టోల్ ఫ్రీ 8002471234 (సౌదీ లోపలి నుంచి మాత్రమే); వాట్సాప్ +966-536216082 (మెసేజ్‌లు మాత్రమే)
- జెడ్డా కాన్సులేట్: +966-12-2614093, +966-556122301; వాట్సాప్ +966-536209704 (మెసేజ్‌లు మాత్రమే)
