అమెరికాలోని బోస్టన్ నగరంలో తెలంగాణ సంస్కృతి, సంప్రదాయాలను ప్రతిబింబించే బతుకమ్మ వేడుకలను మాన అమెరికన్ తెలుగు అసోసియేషన్ (MATA) ఆధ్వర్యంలో ఘనంగా నిర్వహించారు.
ఈ కార్యక్రమానికి ఇండియన్ అసోసియేషన్ ఆఫ్ గ్రేటర్ బోస్టన్ (IAGB), ఇండియన్ అమెరికన్స్ ఇన్ బర్లింగ్టన్ (IAB) వంటి తెలుగు సంస్థలు పూర్తి మద్దతును అందించాయి.
తక్కళ్లపల్లి అరవింద్, సింగిరెడ్డి సురేందర్ రెడ్డి, రమేష్ గెంటియాల, శంతన్ తాళ్లపల్లి వంటి వారు ఈ వేడుకల సమన్వయాన్ని చూసుకున్నారు.
సుమారు 1200 మందికి పైగా తెలుగు ప్రజలు తమ కుటుంబాలతో కలిసి ఈ సంబరాల్లో పాలుపంచుకున్నారు. తెలంగాణ పల్లె వాతావరణాన్ని గుర్తుచేసేలా ఈ వేడుకలు సందడిగా సాగాయి.
మహిళలు సంప్రదాయ వస్త్రాలు ధరించి, రంగురంగుల పూలతో బతుకమ్మలను అందంగా అలంకరించారు. ప్రత్యేక పూజలు చేసి, బతుకమ్మ పాటలు, కోలాటాలు, నృత్యాలతో వేడుకలను జరుపుకున్నారు.
