అమెరికాలోని మిషిగన్ రాష్ట్రం పాంటియాక్‌లో ఉన్న దేవి పరాశక్తి ఆలయం నుంచి ఇంటికి వెళ్తున్న ఒక భక్తుడి కారుపై ఈ నెల 19న రాత్రి సుమారు 10 గంటలకు ఎవరో కాల్పులు జరిపారు. ఆలయానికి కొంత దూరంలో, ఆబర్న్ హిల్స్–పాంటియాక్ సరిహద్దు దగ్గర ఈ ఘటన జరిగింది. భక్తుడికి ఎలాంటి గాయాలు కాలేదు.
ఆలయ కమిటీ వివరణ
ఈ ఘటన యాదృచ్ఛికంగా జరిగిందని, ఆలయానికి గానీ అక్కడి పూజా కార్యక్రమాలకు గానీ దీనితో సంబంధం లేదని ఆలయ కమిటీ ఫేస్‌బుక్‌లో ప్రకటించింది. "పోలీసులు నిందితుడిని పట్టుకున్నారు. ఇది జాతి విద్వేషంతో జరిగింది కాదని నిర్ధారించారు" అని తెలిపింది. నవరాత్రి ఉత్సవాలు ప్రశాంతంగా ముగిశాయని, రికార్డు స్థాయిలో భక్తులు వచ్చారని చెప్పింది.
మరో ఘటన
ఈ నెల 18న ఫార్మింగ్టన్ హిల్స్‌లోని సుబ్రహ్మణ్య స్వామి ఆలయంలోకి ఒక వ్యక్తి చొరబడి ఆవరణను అపరిశుభ్రం చేసి, భక్తులను దూషించినట్లు సోషల్ మీడియాలో పోస్టులు వచ్చాయి. పోలీసులు అతన్ని అరెస్ట్ చేశారని ఆ పోస్టులు చెబుతున్నాయి. ఈ ఘటనను అధికారులు ఇంకా ధ్రువీకరించలేదు.
ఈ నెల మొదట్లో ఇల్లినాయిస్‌లోని అరోరాలో ఉన్న శ్రీ వేంకటేశ్వర స్వామి ఆలయంపై కాల్పులకు కుట్ర పన్నిన వ్యక్తిని పోలీసులు అరెస్ట్ చేశారు. అప్పటి నుంచి అమెరికాలోని హిందూ ఆలయాల భద్రతపై ప్రవాస భారతీయుల్లో ఆందోళన పెరిగింది.
