స్థానిక సంస్థల ఎన్నికల నామినేషన్ల ప్రక్రియలో అభ్యర్థులను అడ్డుకున్నా, వారి పత్రాలను లాక్కున్నా సంబంధిత అధికారులపై కఠిన చర్యలు తీసుకుంటామని రాష్ట్ర ఎన్నికల సంఘం వెల్లడించింది. ఈ మేరకు కలెక్టర్లు, ఎస్పీలకు స్పష్టమైన ఆదేశాలు జారీ చేసింది.
నామినేషన్ల దాఖలుకు ఆటంకాలు కల్పిస్తున్నారని వైఎస్సార్ కాంగ్రెస్ పార్టీ ఫిర్యాదు చేయడంతో ఈ విషయాన్ని ఎన్నికల సంఘం తీవ్రంగా పరిగణించింది.
నామినేషన్ కేంద్రాల వద్ద పటిష్ట భద్రత ఏర్పాటు చేయాలని, సీసీ కెమెరాల నిఘా తప్పనిసరి అని ఎన్నికల సంఘం ఆదేశించింది. రికార్డయిన ఫుటేజీని భద్రపరచాలని సూచించింది.
ఎన్నికలు ప్రశాంతంగా జరిగేలా తగినంత పోలీసు బందోబస్తు కల్పించాలని ఎన్నికల సంఘం పేర్కొంది. పక్షపాతంతో వ్యవహరించే అధికారులపై క్రమశిక్షణా చర్యలు తీసుకుంటామని హెచ్చరించింది.
హైకోర్టు ఆదేశాలను అమలు చేసేందుకు రాష్ట్ర ఎన్నికల సంఘం ఈ ఆదేశాలను జారీ చేసింది. ఎన్నికల ప్రక్రియ పారదర్శకంగా జరిగేలా చూడాలని సూచించింది.
