నేషనల్ హెల్త్ మిషన్ (ఎన్హెచ్ఎం) ఉద్యోగుల వేతనాలను తగ్గిస్తూ రాష్ట్ర ప్రభుత్వం జారీ చేసిన జీవో నంబర్ 1195పై తెలంగాణ రక్షణ సేన అధ్యక్షురాలు కల్వకుంట్ల కవిత అభ్యంతరం వ్యక్తం చేశారు. ఈ ఉత్తర్వును వెంటనే రద్దు చేయాలని ఆమె ప్రభుత్వాన్ని డిమాండ్ చేశారు.
బంజారాహిల్స్‌లోని పార్టీ కార్యాలయంలో ఎన్హెచ్ఎం ఉద్యోగ సంఘాల జేఏసీ నాయకులతో కలిసి కవిత విలేకరులతో మాట్లాడారు. ఈ చర్య అత్యంత అన్యాయమని, ముఖ్యమంత్రి రేవంత్ రెడ్డి ఈ విషయంలో జోక్యం చేసుకుని నిర్ణయాన్ని పునఃపరిశీలించాలని ఆమె కోరారు.
రాష్ట్రవ్యాప్తంగా సుమారు 17 వేల మంది ఎన్హెచ్ఎం ఉద్యోగులు పనిచేస్తున్నారని కవిత పేర్కొన్నారు. కొత్త జీవో కారణంగా కొందరు ఉద్యోగుల జీతాల్లో రూ.4 వేల నుంచి రూ.5 వేల వరకు కోత పడిందని ఆమె ఆరోపించారు.
ధరలు, ద్రవ్యోల్బణం పెరుగుతున్న ప్రస్తుత పరిస్థితుల్లో వేతనాలు తగ్గించడం ఎంతవరకు సమంజసమని ఆమె ప్రభుత్వాన్ని ప్రశ్నించారు. ఇది ఉద్యోగుల ఆర్థిక భద్రతకు ఆటంకం కలిగిస్తుందని అన్నారు.
ఎన్హెచ్ఎం ఉద్యోగుల సమస్యలను ప్రభుత్వం పరిష్కరించకపోతే పెద్ద ఎత్తున ఆందోళనలు చేపడతామని కవిత హెచ్చరించారు. ఉద్యోగుల పక్షాన పోరాటానికి తాము సిద్ధంగా ఉన్నామని ఆమె స్పష్టం చేశారు.
