ఎన్నికల సంఘం చేపట్టిన 'స్పెషల్ ఇంటెన్సివ్ రివిజన్' (SIR) ప్రక్రియలో తీవ్రమైన లోపాలు ఉన్నాయని తెలంగాణ ప్రదేశ్ కాంగ్రెస్ కమిటీ (TPCC) అధ్యక్షుడు మహేష్ కుమార్ గౌడ్ విమర్శించారు. బీజేపీకి అనుకూలం కాని ఓట్లను తొలగిస్తున్నారని ఆయన ఆరోపించారు.
ఈ ఓటర్ల జాబితా సవరణ విధానంలో పారదర్శకత కొరవడిందని మహేష్ కుమార్ గౌడ్ పేర్కొన్నారు. ఈ ప్రక్రియలో భాగంగా తనకు కూడా ఒక నోటీసు అందిందని ఆయన తెలిపారు.
గాంధీ భవన్‌లో విలేకరులతో మాట్లాడిన ఆయన, ఎన్నికల వ్యవస్థలో పాటించాల్సిన ప్రాథమిక నిబంధనలను విస్మరిస్తున్నారని ఆరోపణలు చేశారు.
ఓటర్ల జాబితా సవరణలో జరుగుతున్న లోపాలను తక్షణమే సరిదిద్దాలని ఆయన డిమాండ్ చేశారు. ఎన్నికల సంఘం నిబంధనలను కచ్చితంగా పాటించాలని సూచించారు.
