తెలంగాణలో ఆయిల్‌పామ్‌ సాగు చేస్తున్న రైతులు ఎదుర్కొంటున్న విద్యుత్తు లైన్ల సమస్యకు రాష్ట్రవ్యాప్తంగా ఒక ఉమ్మడి విధానం రూపొందించాలని వ్యవసాయ శాఖ మంత్రి తుమ్మల నాగేశ్వరరావు ముఖ్యమంత్రి రేవంత్‌రెడ్డిని కోరారు. శనివారం ముఖ్యమంత్రి నివాసంలో ఆయనను కలిసి ఈ అంశంపై వినతిపత్రం సమర్పించారు.
ఆయిల్‌పామ్‌ తోటల్లో విద్యుత్తు ప్రమాదాలు నివారించేందుకు 11 కేవీ బేర్‌ కండక్టర్ల స్థానంలో కవర్డ్‌ కండక్టర్లను ఏర్పాటు చేయాలని మంత్రి తుమ్మల విజ్ఞప్తి చేశారు. ఈ మార్పు రైతులకు మరింత భద్రతను కల్పిస్తుందని ఆయన వివరించారు.
రైతుల సమస్యల పరిష్కారంతో పాటు సాగునీటి ప్రాజెక్టుల నిర్మాణ వ్యయాన్ని తగ్గించే ప్రతిపాదనలను కూడా మంత్రి తుమ్మల ముఖ్యమంత్రి దృష్టికి తీసుకెళ్లారు. రాష్ట్ర అభివృద్ధికి సంబంధించిన పలు కీలక అంశాలపై వారు చర్చించారు.
రాష్ట్రంలో ఆయిల్‌పామ్‌ సాగు విస్తరిస్తున్నందున విద్యుత్తు లైన్లు రైతులకు ఇబ్బందికరంగా మారుతున్నాయని తుమ్మల తెలిపారు. ఇప్పటికే సాగు చేస్తున్న రైతులు, కొత్తగా తోటలు వేయాలనుకునే వారు కూడా ఈ సమస్యను ఎదుర్కొంటున్నారని ఆయన వివరించారు.
