పిల్లలే ప్రధాన పాత్రల్లో నటించిన కుటుంబ కథా చిత్రం 'సమ్మర్ హాలిడేస్' నవంబర్ 6న విడుదల కానుంది. గురువారం హైదరాబాద్‌లో జరిగిన మీడియా సమావేశంలో చిత్ర బృందం విడుదల తేదీని ప్రకటించింది. శ్రీకర్ దర్శకత్వం వహించిన ఈ సినిమాను ధీరజ్ మొగిలినేని ఎంటర్‌టైన్‌మెంట్స్ బ్యానర్‌పై ధీరజ్ మొగిలినేని నిర్మించారు.
మాస్టర్ రోహన్ రాయ్, మాస్టర్ అరుణ్, బేబీ ఖుషీ ముఖ్య పాత్రల్లో నటించారు. సింజిత్ యర్రమిల్లి సంగీతం అందించారు. పెద్దవాళ్లను తమ చిన్ననాటి వేసవి సెలవుల్లోకి తీసుకెళ్లే సినిమా ఇదని నిర్మాత చెప్పారు.
టికెట్ ధరలపై
సినిమా పరిశ్రమ నిజంగా ఎదగాలని ప్రభుత్వం కోరుకుంటే, ప్రతి సినిమాకూ టికెట్ ధరల పెంపునకు అనుమతి ఇవ్వడం ఆపాలని ధీరజ్ అన్నారు. తరచూ ధరలు పెంచడం వల్ల సామాన్య ప్రేక్షకుడికి థియేటర్‌కు వెళ్లడం భారంగా మారుతోందని అభిప్రాయపడ్డారు.
చిన్న సినిమాలకు అందుబాటు ధరలే ఉండాలని తాము నమ్ముతామని, ప్రేక్షకులు ఈ సినిమాను పెద్ద తెరపై చూడాలన్నదే తమ కోరిక అని చెప్పారు. పెద్ద సినిమాలతో పోటీ లేకుండా ఉండేలా విడుదల తేదీని ఎంచుకున్నామన్నారు. ఫీల్‌గుడ్ కుటుంబ కథా చిత్రంగా ఈ సినిమాకు మంచి స్పందన వస్తుందని దర్శకుడు శ్రీకర్ ధీమా వ్యక్తం చేశారు.
