అన్నమయ్య జిల్లా పుంగనూరులో స్థానిక సంస్థల నామినేషన్ల సందర్భంగా ఉద్రిక్త పరిస్థితులు నెలకొన్నాయి. నామినేషన్ల మొదటి రోజే వైసీపీ, తెలుగుదేశం శ్రేణుల మధ్య దాడులు చోటుచేసుకున్నాయి.
వైసీపీ లోక్‌సభ పక్షనేత, రాజంపేట ఎంపీ మిథున్‌రెడ్డి, ఇతర నేతలు వైసీపీ అభ్యర్థుల తరపున నామినేషన్లు దాఖలు చేసేందుకు పుంగనూరు నామినేషన్‌ కేంద్రానికి వెళ్లారు.
ఈ సమయంలో టీడీపీ శ్రేణులు మిథున్‌రెడ్డి కాన్వాయ్‌పై రాళ్లు, కర్రలతో దాడిచేశారు. ఈ ఘటనతో అక్కడ తీవ్ర ఉద్రిక్తత నెలకొంది.
స్థానిక సంస్థల ఎన్నికల నామినేషన్ల ప్రక్రియ ప్రారంభం కాగానే ఈ ఘర్షణలు చోటుచేసుకోవడం ఆందోళన కలిగిస్తోంది.
రాష్ట్రంలో ఎన్నికల వాతావరణం వేడెక్కుతున్న తరుణంలో ఇలాంటి ఘటనలు శాంతిభద్రతలకు సవాలుగా మారే అవకాశం ఉంది.
