తిరుమల శ్రీవారి బ్రహ్మోత్సవాల్లో శనివారం జరిగిన గజ వాహన సేవలో అద్భుతమైన సాంస్కృతిక ప్రదర్శనలు జరిగాయి. వర్షాన్ని సైతం లెక్కచేయకుండా మాడ వీధుల్లో కళాకారులు తమ నైపుణ్యాన్ని ప్రదర్శించారు.
ఈ ప్రదర్శనల్లో ఏడు రాష్ట్రాలు, పుదుచ్చేరి కేంద్రపాలిత ప్రాంతం, ఖతార్, దుబాయ్ నుండి కళాకారులు పాల్గొన్నారు. మొత్తం 16 కళాబృందాలకు చెందిన 451 మంది కళాకారులు భక్తులను అలరించారు.
భారతీయ శాస్త్రీయ కళల ప్రాముఖ్యతను చాటుతూ ఖతార్ నుండి భరతనాట్యం, దుబాయ్ నుండి కూచిపూడి ప్రదర్శనలు జరిగాయి. పుదుచ్చేరి నుండి కరగట్టం, ఆంధ్రప్రదేశ్ నుండి లంబాడీ నృత్యం ప్రాంతీయ సంస్కృతిని ప్రతిబింబించాయి.
మహారాష్ట్ర నుండి లేజిమ్, మధ్యప్రదేశ్ నుండి కథక్, పంజాబ్ నుండి భాంగ్రా నృత్యాలు భారతదేశ సాంస్కృతిక వైవిధ్యాన్ని ప్రదర్శించాయి. కర్ణాటక నుండి గజేంద్ర మోక్షం అనే భక్తి నృత్య రూపకం గజ వాహన సేవ ఆధ్యాత్మిక ప్రాముఖ్యతను పెంచింది.
ధర్మ ప్రచార పరిషత్, శ్రీ వెంకటేశ్వర సంగీత నృత్య కళాశాల, దాస సాహిత్య ప్రాజెక్ట్, అన్నమాచార్య ప్రాజెక్ట్ నుండి నాలుగు బృందాలు ఈ ప్రదర్శనలను సమర్పించాయి. ఈ వివరాలను టీటీడీ ముఖ్య ప్రజా సంబంధాల అధికారి వెల్లడించారు.
