వికారాబాద్ జిల్లాలోని కుల్కచర్ల మండలంలోని తండాల ప్రజలు ఉపాధి కోసం మళ్లీ వలస బాట పడుతున్నారు. గతంలో బీఆర్‌ఎస్‌ పాలనా కాలంలో వలసలు వీడి సొంతూర్లకు చేరుకున్న తండాల వాసులు, మూడేండ్ల కాంగ్రెస్ పాలనలో మళ్లీ ఊళ్లు వదిలిపోతున్నారు.
సాగునీరు, కరెంటు లేకపోవడంతో పంటలు ఎండిపోతున్నాయని గిరిజన రైతులు ఆవేదన వ్యక్తం చేస్తున్నారు. దీంతో వారికి ఉపాధి కరువై, జీవనోపాధి కోసం ఇతర ప్రాంతాలకు వెళ్లక తప్పడం లేదు.
కుల్కచర్ల మండలంలోని తండాల్లోని ఇళ్లకు తాళాలు వేసి ఉన్న దృశ్యాలు ఈ వలసల తీవ్రతను స్పష్టం చేస్తున్నాయి. కుటుంబాలు మొత్తం వలస వెళ్తుండటంతో గ్రామాలు నిర్మానుష్యంగా మారుతున్నాయి.
గతంలో జిల్లాలోని పరిగి, కొడంగల్‌ నియోజకవర్గాల ప్రజలు ఉపాధి కోసం దుబాయ్‌, ముంబై, పుణె, హైదరాబాద్‌కు వెళ్లేవారు. బీఆర్‌ఎస్‌ ప్రభుత్వం అమలుచేసిన రైతు సంక్షేమ పథకాలు, అభివృద్ధి, ఉపాధి కల్పనతో తిరిగి సొంతూళ్లకు చేరుకున్నారు.
అయితే, ప్రస్తుతం కాంగ్రెస్ పాలనలో పరిస్థితులు మారిపోయాయని, ఉపాధి అవకాశాలు లేకపోవడంతో మళ్లీ వలసలు అనివార్యమయ్యాయని తండాల ప్రజలు చెబుతున్నారు.
ఈ వలసల వల్ల వికారాబాద్ జిల్లాలోని గ్రామీణ ఆర్థిక వ్యవస్థపై తీవ్ర ప్రభావం పడుతోంది. స్థానిక ప్రజలకు ఉపాధి కల్పించి, వలసలను నివారించాల్సిన అవసరం ఎంతైనా ఉంది.
