అమెరికాలో చదువుతున్న, చదవాలనుకుంటున్న తెలుగు విద్యార్థులకు ఆందోళన కలిగించే ప్రతిపాదన ఇది. ఎఫ్-1 వీసాపై చదువు పూర్తి చేసిన విద్యార్థులు ఉద్యోగానుభవం కోసం వాడే ఓపీటీపై భారీ ఫీజు విధించాలని అమెరికా హోంల్యాండ్ సెక్యూరిటీ శాఖ (డీహెచ్ఎస్) ప్రతిపాదించింది. అక్టోబర్ 8న ఈ ప్రతిపాదిత నిబంధన ఫెడరల్ రిజిస్టర్‌లో ప్రచురితమైంది.
ప్రతిపాదనలో ఏముంది?
- మొదటి ఓపీటీకి 70 వేల డాలర్లు, ఆ తర్వాతి ఓపీటీకి (స్టెమ్ ఓపీటీ పొడిగింపు సహా) 30 వేల డాలర్లు.
- విద్యార్థిని ఓపీటీకి సిఫారసు చేసే ముందు ఫీజును విశ్వవిద్యాలయం చెల్లించాలి. ఆ భారాన్ని విద్యార్థులపై లేదా ఉద్యోగ సంస్థలపై వేసే అవకాశం ఉందని డీహెచ్ఎస్ స్వయంగా అంగీకరించింది.
- 2024లో 1,94,554 మంది ఓపీటీలో, 95,384 మంది స్టెమ్ ఓపీటీలో ఉన్నారని డీహెచ్ఎస్ పేర్కొంది.
ఇప్పుడేం జరుగుతుంది?
ఇది ఇంకా ప్రతిపాదన మాత్రమే, అమల్లోకి రాలేదు. ప్రస్తుత ఓపీటీ నిబంధనలు యథాతథంగా ఉన్నాయి. regulations.govలో నవంబర్ 9 వరకు ఎవరైనా అభిప్రాయం చెప్పొచ్చు. ఆ తర్వాతే తుది నిర్ణయం వస్తుంది.
మోసాలను అరికట్టడం, అమెరికా ఉద్యోగులను కాపాడటం కోసమే ఈ ఫీజు అని డీహెచ్ఎస్ చెబుతోంది. ఇలాంటి ఫీజు వస్తే స్టెమ్ కాని కోర్సులకు విశ్వవిద్యాలయాలు ఓపీటీ మద్దతు తగ్గించే అవకాశం ఉందని అంచనా. ఇప్పటికే ఆగస్టులో అమెరికాకు వెళ్లిన భారత విద్యార్థుల సంఖ్య 39 శాతం తగ్గింది.
