విజయనగరం పైడితల్లి అమ్మవారి జాతర ఈ నెల 26 నుంచి నవంబర్ 11 వరకు జరగనుంది. ఇప్పటికే భక్తులు మండల దీక్షలు మొదలుపెట్టారు. విజయదశమి తర్వాత వచ్చే మొదటి మంగళవారం సిరిమానోత్సవం జరపడం ఆనవాయితీ.
ఉత్సవాల వివరాలు
- అక్టోబర్ 26 (సోమవారం): తొలేళ్ల ఉత్సవం
- అక్టోబర్ 27 (మంగళవారం): సిరిమానోత్సవం
- నవంబర్ 3 (మంగళవారం): తెప్పోత్సవం
- నవంబర్ 7 (శనివారం): కలశజ్యోతి ఊరేగింపు
- నవంబర్ 10 (మంగళవారం): ఉయ్యాల కంబాల ఉత్సవం
- నవంబర్ 11 (బుధవారం): చండీహోమంతో ముగింపు
తొలేళ్లు, సిరిమాను
తొలేళ్ల రోజున రైతులు తమ పొలాల్లో వేసే విత్తనాలను అమ్మవారి ముందు ఉంచి, మంచి వర్షాలు, పంటలు రావాలని మొక్కుకుంటారు. మహిళలు అలంకరించిన కుండలు, పట్టుచీరలు తలపై పెట్టుకుని ఆలయానికి వచ్చి మొక్కులు తీర్చుకుంటారు. సిరిమానోత్సవం రోజు చింత చెట్టు కొమ్మతో చేసిన సుమారు 60 అడుగుల సిరిమాను చివర పూజారి కూర్చుంటారు. ఆ సమయంలో పూజారిలో అమ్మవారే కొలువై భక్తులను ఆశీర్వదిస్తారని భక్తుల విశ్వాసం. మూడు లాంతర్ల కూడలి నుంచి కోట వరకు సిరిమాను మూడుసార్లు తిరుగుతుంది. విజయనగరం రాజ కుటుంబీకులు కోట బురుజుపై నుంచి ఉత్సవాన్ని తిలకిస్తారు.
ఉత్సవానికి నెల రోజుల ముందు సిరిమాను చెట్టు ఎక్కడ ఉందో అమ్మవారు పూజారికి కలలో తెలియజేస్తారని భక్తులు నమ్ముతారు. ఉత్సవం తర్వాత సిరిమానును చిన్న ముక్కలుగా చేసి ప్రసాదంగా పంచుతారు. వాటిని భక్తులు ఇంట్లో పూజగదిలో, పొలాల్లో భద్రంగా ఉంచుకుంటారు.
భద్రతా ఏర్పాట్లు
కలెక్టర్ ఎస్. రామసుందర్ రెడ్డి, ఎస్పీ ఆర్. దామోదర్ ఉత్సవ మార్గంలో బారికేడ్లు, క్యూలైన్లు, కంట్రోల్ రూమ్‌లను పరిశీలించారు. సీసీ కెమెరాలతో రద్దీని పర్యవేక్షించాలని, శిథిల భవనాలపైకి భక్తులు ఎక్కకుండా చూడాలని, తొక్కిసలాట జరగకుండా జాగ్రత్తలు తీసుకోవాలని ఆదేశించారు. తుపాను హెచ్చరికల దృష్ట్యా వాతావరణాన్ని గమనిస్తూ ప్రత్యామ్నాయ ఏర్పాట్లు చేయాలని, వైద్య శిబిరాలు, అంబులెన్సులు, అగ్నిమాపక వాహనాలు సిద్ధంగా ఉంచాలని సూచించారు.
