యాన్బూ (సౌదీ అరేబియా): 1989లో బీఎస్సీ కెమిస్ట్రీ పూర్తి కాగానే ఉపాధి కోసం సౌదీ అరేబియా వెళ్లిన పశ్చిమ గోదావరి జిల్లా నర్సాపురం వాసి శీలా జాన్ సుందర్ 37 ఏళ్ల తర్వాత స్వదేశానికి తిరిగి వస్తున్నారు. యాన్బూ పారిశ్రామిక పట్టణంలో ల్యాబొరేటరీ టెక్నీషియన్‌గా ఉద్యోగం మొదలుపెట్టిన ఆయన, ఓ ప్రముఖ సంస్థలో పర్యావరణ నిపుణుడి స్థాయికి ఎదిగారు.
సేవలో ముందు వరుసలో
- కోవిడ్ కష్టకాలంలో తెలుగు కార్మికులకు ఆహార సామగ్రి అందజేశారు
- తాజ్ యాన్బూ తెలుగు ప్రవాసీ సంఘం, తర్వాత సాటాతో కలిసి సేవా కార్యక్రమాల్లో పాల్గొన్నారు
ఆయన గౌరవార్థం తెలుగు సమాజం ఏర్పాటు చేసిన వీడ్కోలు సభలో యాన్బూ తెలుగు సమాజం అధ్యక్షుడు కాశీరాం మాట్లాడుతూ, యాన్బూ తెలుగు సమాజం ఒక అమూల్య రత్నాన్ని కోల్పోతోందని అన్నారు. ప్రవాసంలో ఉన్న ప్రతి తెలుగువారికీ జాన్ సుందర్ ఆదర్శమని సాటా అధ్యక్షుడు మల్లేశన్ పేర్కొన్నారు.
గల్ఫ్ దేశాల నిబంధనల వల్ల ఉద్యోగ విరమణ తర్వాత అక్కడే స్థిరపడటం చాలామంది ప్రవాసులకు సాధ్యం కాదు. దశాబ్దాల పాటు అక్కడ పనిచేసినవారు చివరికి సొంతూళ్లకు తిరిగి రావాల్సిందే.
