విశాఖపట్నం: సీఐఐ భాగస్వామ్య సదస్సుకు రెండు రోజుల ముందు రాష్ట్ర ప్రభుత్వం పెట్టుబడుల లెక్కలను వెల్లడించింది. 2024 జూన్ నుంచి మొత్తం 714 ప్రతిపాదనలు రాగా, వాటిలో 526 ప్రాజెక్టులను కార్యరూపంలోకి తెచ్చామని ప్రభుత్వం మంగళవారం విడుదల చేసిన ప్రకటనలో తెలిపింది. వీటి విలువ ₹17.2 లక్షల కోట్లు కాగా, 19.3 లక్షల మందికి ఉపాధి లభిస్తుందని పేర్కొంది.
సర్కారు చెప్పిన అంకెలు
- మొత్తం పెట్టుబడుల పైప్‌లైన్: ₹22.6 లక్షల కోట్లు; అందులో 76% విలువ కార్యరూపంలోకి
- ఇంకా పరిశీలనలో: 188 ప్రాజెక్టులు, విలువ ₹5.4 లక్షల కోట్లు
- పనులు మొదలైనవి లేదా మొదలు కానున్నవి: 303 ప్రాజెక్టులు, ₹7.1 లక్షల కోట్లు, 7.7 లక్షల ఉద్యోగాలు
- అక్టోబర్‌లో ఐదు ప్రాంతీయ సదస్సుల్లో ₹85,561 కోట్ల విలువైన 195 ఎంవోయూలు
పూడిమడకలో ఎన్టీపీసీ గ్రీన్ ఎనర్జీ ₹1.85 లక్షల కోట్ల గ్రీన్ హైడ్రోజన్ హబ్, నక్కపల్లిలో ఏఎం/ఎన్ఎస్ ఇండియా ₹1.36 లక్షల కోట్ల స్టీల్ ప్లాంట్, రామాయపట్నంలో బీపీసీఎల్ ₹96,862 కోట్ల రిఫైనరీ ప్రతిపాదన ప్రధాన ప్రాజెక్టులని ప్రభుత్వం తెలిపింది. పెనుకొండలో కియా ప్లాంట్, 35 అనుబంధ యూనిట్లతో 24,237 మందికి ప్రత్యక్ష ఉపాధి లభించిందని పేర్కొంది. 2023–24లో 92 మిలియన్ డాలర్లుగా ఉన్న ఎఫ్‌డీఐ 2025–26లో 600 మిలియన్ డాలర్లు దాటిందని ప్రభుత్వ గణాంకాలు చెబుతున్నాయి.
నవంబర్ 12, 13 తేదీల్లో విశాఖలో జరిగే 31వ సీఐఐ భాగస్వామ్య సదస్సుకు దాదాపు 60 దేశాల ప్రతినిధులు హాజరవుతారని అంచనా. ప్రకటించిన పెట్టుబడులు వాణిజ్య ఉత్పత్తి దశకు చేరి ఉద్యోగాలు సృష్టించడమే ఇప్పుడు అసలు సవాల్.
