ఎల్‌నినో ప్రభావంతో రానున్న రోజుల్లో ఏర్పడే సమస్యల పట్ల జిల్లా యంత్రాంగం ముందస్తు ప్రణాళికతో అప్రమత్తంగా ఉండాలని ఉమ్మడి వరంగల్ జిల్లా ప్రత్యేక అధికారి, రాష్ట్ర మున్సిపల్ అడ్మినిస్ట్రేషన్ కార్యదర్శి, సీడీఎంఏ డాక్టర్ టి.కె.శ్రీదేవి ఆదేశించారు.
శనివారం హనుమకొండ జిల్లా కలెక్టరేట్‌లోని వీడియో కాన్ఫరెన్స్ హాలు నుండి ఉమ్మడి వరంగల్ జిల్లా కలెక్టర్లతో ఆమె వీడియో కాన్ఫరెన్స్ నిర్వహించారు. ఈ సమావేశంలో హనుమకొండ జిల్లా కలెక్టర్ చాహత్ బాజ్‌పాయి, ఇతర అధికారులు పాల్గొన్నారు.
ఎల్‌నినో ప్రభావం, వాతావరణ మార్పులు, వర్షపాత పరిస్థితులు, తాగునీటి లభ్యత వంటి అంశాలపై డాక్టర్ టి.కె.శ్రీదేవి సమీక్షించారు. వ్యవసాయం, సాగునీరు, విద్యుత్ సరఫరా, పశుసంపద, ప్రజారోగ్య పరిరక్షణపై కూడా చర్చించారు.
ఉమ్మడి వరంగల్ జిల్లాలోని హనుమకొండ, వరంగల్, జనగామ, మహబూబాబాద్, జయశంకర్ భూపాలపల్లి, ములుగు జిల్లాల కలెక్టర్లకు ఆమె పలు సూచనలు చేశారు. తాగునీటి సరఫరాకు అంతరాయం లేకుండా చూడాలని ఆదేశించారు.
ప్రత్యామ్నాయ పంటల సాగుకు రైతులకు అవగాహన కల్పించాలని, పశుగ్రాసం కొరత లేకుండా చర్యలు తీసుకోవాలని సూచించారు. ప్రజారోగ్య పరిరక్షణకు అవసరమైన అన్ని జాగ్రత్తలు తీసుకోవాలని ఆమె స్పష్టం చేశారు.
రానున్న రోజుల్లో ఎల్‌నినో ప్రభావం తీవ్రంగా ఉండే అవకాశం ఉన్నందున, అన్ని శాఖల అధికారులు సమన్వయంతో పనిచేయాలని డాక్టర్ టి.కె.శ్రీదేవి ఆదేశించారు.
