హైదరాబాద్ వాణిజ్య రియల్ ఎస్టేట్ రంగానికి అంతర్జాతీయ గుర్తింపు మరోసారి లభించింది. ప్రముఖ లాజిస్టిక్స్ సంస్థ ఫెడ్‌ఎక్స్ గచ్చిబౌలి-ఫైనాన్షియల్ డిస్ట్రిక్ట్ కారిడార్‌లోని ఫీనిక్స్ సెంటారస్ ఐటీ పార్క్‌లో భారీ కార్యాలయ స్థలాన్ని లీజుకు తీసుకుంది.
ఈ ఒప్పందం ప్రకారం, ఫెడ్‌ఎక్స్ 1.19 లక్షల చదరపు అడుగుల విస్తీర్ణంలో ఐదేళ్ల కాలానికి కార్యాలయ స్థలాన్ని అద్దెకు తీసుకుంది. ఈ లీజు డీల్ స్థానిక రియల్టీ మార్కెట్‌లో సరికొత్త రికార్డులను సృష్టించింది.
నెలవారీ అద్దె 93.2 లక్షల ప్రాతిపదికన ఈ ఒప్పందం కుదిరింది. ఐదేళ్ల లీజు కాలంలో ఫెడ్‌ఎక్స్ చెల్లించే మొత్తం అద్దె విలువ దాదాపు రూ. 55.92 కోట్లు.
హైదరాబాద్‌లో అందుబాటులో ఉన్న ప్రపంచ స్థాయి ఐటీ, బిజినెస్ పార్కులు, మెరుగైన మౌలిక సదుపాయాలు అంతర్జాతీయ దిగ్గజ కంపెనీలను ఆకర్షిస్తున్నాయి. తమ వ్యాపార కార్యకలాపాలను ఇక్కడే విస్తరించేందుకు ఈ కంపెనీలు ఆసక్తి చూపుతున్నాయి.
ఐటీ, గ్లోబల్ కేపబిలిటీ సెంటర్లు, లాజిస్టిక్స్ రంగాలకు చెందిన ప్రముఖ కార్పొరేట్ సంస్థలు నగరంలో వందల కోట్ల అద్దె ఒప్పందాలు కుదుర్చుకుంటున్నాయి. ఇది హైదరాబాద్ రియల్ ఎస్టేట్ రంగానికి మరింత బలాన్ని చేకూరుస్తోంది.
