తిరుమల: తిరుమల శ్రీవేంకటేశ్వర స్వామి ఆలయంలో నవంబర్ 16న వార్షిక పుష్పయాగ మహోత్సవం వైఖానస ఆగమ శాస్త్రోక్తంగా జరగనుంది. ఇందుకు నవంబర్ 15న సాయంత్రం 6 నుంచి 8 గంటల వరకు అంకురార్పణ నిర్వహిస్తారని టీటీడీ తెలిపింది.
16న కార్యక్రమాలు
- ఉదయం రెండో అర్చన, రెండో గంట, నైవేద్యం తర్వాత సంపంగి ప్రాకారంలోని కల్యాణ మండపంలో శ్రీదేవి, భూదేవి సమేత మలయప్పస్వామికి స్నపన తిరుమంజనం
- మధ్యాహ్నం 1 నుంచి సాయంత్రం 5 గంటల వరకు వివిధ రకాల పుష్పాలు, పత్రాలతో పుష్పయాగం
- సాయంత్రం సహస్ర దీపాలంకార సేవ తర్వాత నాలుగు మాడ వీధుల్లో స్వామివారి ఊరేగింపు
పుష్పయాగం సందర్భంగా నవంబర్ 16న కల్యాణోత్సవం, ఊంజల్ సేవ, ఆర్జిత బ్రహ్మోత్సవం సేవలను టీటీడీ రద్దు చేసింది. ఆ రోజు తిరుమల యాత్ర ప్లాన్ చేసుకునే భక్తులు ఈ మార్పులను గమనించాలని సూచించింది.
మరోవైపు టీటీడీ 2027 క్యాలెండర్లు, డైరీలు అందుబాటులోకి వచ్చాయి. టీటీడీ అధికారిక వెబ్‌సైట్‌లో ఆన్‌లైన్‌లో బుక్ చేసుకోవచ్చు. తిరుమల, తిరుపతి, తిరుచానూరులోని విక్రయ కేంద్రాలతో పాటు హైదరాబాద్‌లోని జూబ్లీహిల్స్, హిమాయత్‌నగర్, విజయవాడ, చెన్నై, బెంగళూరు, న్యూఢిల్లీ, ముంబై సహా పలు నగరాల్లోని టీటీడీ సమాచార కేంద్రాల్లోనూ లభిస్తాయి.
