ఆసిఫాబాద్ జిల్లా కాగజ్‌నగర్ ఎక్స్ రోడ్ వద్ద రెబ్బెన పోలీసులు అక్రమంగా తరలిస్తున్న 5.232 కిలోల ఎండు గంజాయిని స్వాధీనం చేసుకున్నారు. ఈ ఘటనలో ఒక భార్యభర్తను అరెస్టు చేసినట్లు జిల్లా ఎస్పీ నితికా పంత్ వెల్లడించారు.
సోమవారం ఏర్పాటుచేసిన విలేకరుల సమావేశంలో ఎస్పీ నితికా పంత్ ఈ వివరాలను తెలిపారు. పట్టుబడిన గంజాయి విలువ సుమారు రూ.2.7 లక్షలు ఉంటుందని ఆమె పేర్కొన్నారు.
ఈస్గాంకు చెందిన జుమూర్‌ గెయిన్‌, ఆమె భర్త సురంజన్‌ గెయిన్‌ కాగజ్‌నగర్‌లో నివాసం ఉంటున్నారు. ఈ దంపతులు మంచిర్యాల వైపు ద్విచక్రవాహనంపై వెళ్తుండగా రెబ్బెన పోలీసులు తనిఖీలు నిర్వహించి పట్టుకున్నారు.
భర్త సురంజన్‌ ఈ నెల 14న ఒడిస్సాకు వెళ్లి పింటూ అనే వ్యక్తి వద్ద రూ.15 వేలకు 5.232 కిలోల గంజాయిని కొనుగోలు చేసి తీసుకువచ్చినట్లు పోలీసులు తెలిపారు. దీనిని తరలిస్తుండగా పట్టుబడ్డారు.
పోలీసులు గంజాయితో పాటు, ద్విచక్రవాహనాన్ని, సెల్‌ఫోన్లను కూడా స్వాధీనం చేసుకున్నారు. ఈ కేసుపై తదుపరి విచారణ కొనసాగుతుందని ఎస్పీ నితికా పంత్ స్పష్టం చేశారు.