కస్తూర్బా గాంధీ బాలికా విద్యాలయాల్లో (కేజీబీవీ) వివిధ కారణాలతో సర్వీసు నుంచి తొలగించిన కాంట్రాక్ట్ ఉద్యోగులను తిరిగి నియమించాలని సమగ్ర శిక్షా రాష్ట్ర ప్రాజెక్ట్ డైరెక్టర్ నవీన్ నికోలస్ ప్రభుత్వానికి ప్రతిపాదనలు సమర్పించారు. ప్రస్తుతం ఖాళీగా ఉన్న పోస్టుల్లో వారిని తిరిగి నియమించాలని ఆయన కోరారు.
పాఠశాలల నిర్వహణలో కొన్ని చిన్నపాటి లోపాల కారణంగా గత కొన్నేళ్లుగా ఈ కాంట్రాక్ట్ సిబ్బందిని ఉద్యోగాల నుంచి తొలగించినట్లు ఎస్పీడీ తన లేఖలో వివరించారు. కేజీబీవీల్లో పనిచేసే వారంతా కాంట్రాక్ట్ పద్ధతిలో ఉన్నవారేనని ఆయన పేర్కొన్నారు.
తొలగించిన వారిలో ఎక్కువ మంది ఎస్సీ, ఎస్టీ, బీసీ సామాజిక వర్గాలకు చెందిన మహిళలేనని నికోలస్ తెలిపారు. చిన్నపాటి తప్పులకు తమకు తీవ్రమైన శిక్ష విధించారని, ఉపాధి కోల్పోయి ఇబ్బందులు పడుతున్నామని బాధితులు నిరంతరం విజ్ఞప్తులు చేస్తున్నారని ఆయన పేర్కొన్నారు.
ఈ విజ్ఞప్తులను పరిగణనలోకి తీసుకుని ఈ నిర్ణయం తీసుకున్నట్లు ఎస్పీడీ వెల్లడించారు. ఉద్యోగాలు కోల్పోయిన మొత్తం 24 మంది సిబ్బందికి సంబంధించిన పూర్తి వివరాలను సమగ్ర శిక్షా విభాగం తన నివేదికలో పొందుపరిచింది.