హైదరాబాద్‌లోని కతేదాన్ ప్రాంతంలోని ప్రేమావతిపేటలో ఉన్న సహిల్ ఫుడ్స్ తయారీ యూనిట్లపై తెలంగాణ ఫుడ్ అండ్ డ్రగ్స్ స్టాండర్డ్స్ అథారిటీ (టీజీ సేఫ్) అధికారులు అక్టోబర్ 19న తనిఖీలు చేశారు. ఈ తనిఖీలలో పలు ఆహార భద్రతా ఉల్లంఘనలు బయటపడ్డాయి.
స్నాక్స్, సేవర్స్ తయారీ, విక్రయాలలో నిమగ్నమైన సహిల్ ఫుడ్స్ ఐదు తయారీ యూనిట్లలో ఎన్‌ఫోర్స్‌మెంట్ బృందాలు తనిఖీలు నిర్వహించాయి. ఈ దాడులలో 55 టన్నుల నకిలీ ఆహార ఉత్పత్తులను అధికారులు స్వాధీనం చేసుకున్నారు.
పట్టుబడిన నకిలీ ఆహార ఉత్పత్తుల విలువ సుమారు రూ.33.94 లక్షలు ఉంటుందని అధికారులు అంచనా వేశారు. ఈ ఉత్పత్తులపై సరైన లేబులింగ్ లేదని, ఆహార భద్రతా ప్రమాణాలను ఉల్లంఘించారని టీజీ సేఫ్ అధికారులు తెలిపారు.
ఆహార భద్రత నిబంధనలను ఉల్లంఘించినందుకు సహిల్ ఫుడ్స్‌పై తదుపరి చర్యలు తీసుకుంటామని టీజీ సేఫ్ అధికారులు స్పష్టం చేశారు. ప్రజల ఆరోగ్యానికి హాని కలిగించే ఇలాంటి ఉత్పత్తులపై నిఘా కొనసాగుతుందని వారు పేర్కొన్నారు.