క్యూనెట్ రూ.10,000 కోట్ల కుంభకోణంలో కీలక నిందితుడైన దిగ్విజయ్ సింగ్‌ను పోలీసులు అరెస్టు చేశారు. దుబాయ్ పారిపోవడానికి ప్రయత్నిస్తుండగా పక్కా సమాచారంతో అతడిని అదుపులోకి తీసుకున్నారు.
దిగ్విజయ్ సింగ్ క్యూనెట్, విహాన్ డైరెక్ట్ సెల్లింగ్ ఇండియా ప్రైవేట్ లిమిటెడ్‌లో భాగస్వామి, ప్రమోటర్‌గా వ్యవహరించాడు. ఈ కేసులో అతడు 11వ నిందితునిగా ఉన్నాడు.
చాలాకాలంగా తప్పించుకు తిరుగుతున్న దిగ్విజయ్ సింగ్‌పై పోలీసులు కొంతకాలం క్రితం లుక్ అవుట్ సర్క్యులర్ జారీ చేశారు. అప్పటి నుంచి పోలీసులు అతడి కోసం గాలిస్తున్నారు.
నిందితులు దేశవ్యాప్తంగా లక్షలాది మందిని మోసం చేసి రూ.10 వేల కోట్లు కొల్లగొట్టారని పోలీసులు తెలిపారు. ఈ కుంభకోణం దేశవ్యాప్తంగా సంచలనం సృష్టించింది.
ఈ-కామర్స్, బైనరీ బిజినెస్ మోడల్స్ పేరుతో భారీ కమీషన్లు, కళ్లు చెదిరే లాభాలు, విదేశీ పర్యటనలు ఆశచూపి ప్రజలను నిలువునా ముంచారు. అమాయకులను ఆకర్షించి వారి డబ్బును దోచుకున్నారు.
ఈ కేసులో తదుపరి విచారణ కొనసాగుతుందని పోలీసులు తెలిపారు. మరికొంతమంది నిందితుల కోసం గాలింపు చర్యలు ముమ్మరం చేశారు.