నార్కట్‌పల్లిలోని ఎంవీఎస్‌ఆర్ ఇంజినీరింగ్ కళాశాలలో శనివారం జరిగిన దండియా ఉత్సవంలో విషాదం చోటుచేసుకుంది. లైట్లతో కూడిన ఆర్చ్ కూలిపోవడంతో ఒక ఇంజినీరింగ్ విద్యార్థిని మృతి చెందగా, 14 మంది గాయపడ్డారు.
గాలి కారణంగానే ఆర్చ్ కూలిపోయిందని పోలీసులు తెలిపారు. ఈ ఘటనలో ఎలక్ట్రికల్ అండ్ ఎలక్ట్రానిక్స్ ఇంజినీరింగ్ (ఈఈఈ) విద్యార్థిని సోనా నారాయణ్ దాస్ తీవ్రంగా గాయపడింది.
తీవ్రంగా గాయపడిన సోనా నారాయణ్ దాస్‌ను వెంటనే సమీపంలోని ప్రైవేట్ ఆసుపత్రికి తరలించారు. అక్కడ చికిత్స పొందుతూ ఆమె మృతి చెందింది.
ఈ ఘటనలో గాయపడిన 14 మంది విద్యార్థులు ప్రస్తుతం ప్రమాదం నుంచి బయటపడ్డారని పోలీసులు వెల్లడించారు. వారికి ఆసుపత్రిలో చికిత్స కొనసాగుతోంది.