హైదరాబాద్‌లోని 20 రెస్టారెంట్లలో టీజీసేఫ్‌ ఎన్‌ఫోర్స్‌మెంట్‌ విభాగం ఫుడ్‌ సేఫ్టీ అధికారులు, పోలీసు సిబ్బందితో కలిసి ఆకస్మిక తనిఖీలు నిర్వహించారు. ఈ తనిఖీల్లో ఏడు హోటళ్ల లైసెన్సులను సస్పెండ్‌ చేయగా, అనుమానాస్పద కల్తీని పరిశీలించేందుకు 20 ఆహార నమూనాలను సేకరించారు.
పలు హోటళ్లలో వంటగదుల అపరిశుభ్రత, బొద్దింకలు, ఈగల బెడద, కుళ్లిన కూరగాయలు, ఆహార పదార్థాల నిల్వలో నిర్లక్ష్యం వంటి లోపాలను టీజీ-సేఫ్‌ అధికారులు గుర్తించారు. ప్రజల ఆరోగ్యానికి హాని కలిగించే అనేక చర్యలు ఈ తనిఖీల్లో వెలుగులోకి వచ్చాయి.
తనిఖీల్లో భాగంగా, పలు హోటళ్ల వంటగదుల్లో నేలలు దెబ్బతినడం, నీరు నిల్వ ఉండటం, గోడలు, ఎగ్జాస్ట్‌ ఫ్యాన్లు, చిమ్మీలపై జిడ్డు పేరుకుపోవడం వంటి లోపాలు బయటపడ్డాయి. బొద్దింకలు, ఈగలు సంచరించడం వంటి అపరిశుభ్ర వాతావరణం కనిపించింది.
కొన్ని చోట్ల కూరగాయలు కుళ్లిపోయి ఉండగా, మరికొన్ని చోట్ల ఆహార పదార్థాలపై ఫంగస్‌ కనిపించింది. ఫ్రిజ్‌లలో శాకాహార, మాంసాహార పదార్థాలను ఒకేచోట కలిపి నిల్వ చేయడం, గడువు ముగిసిన ఆహార పదార్థాలను ఉంచడం వంటివి గుర్తించారు.
వండిన ఆహారాన్ని వార్తాపత్రికలపై పెట్టడం వంటి ప్రజారోగ్యానికి హాని కలిగించే చర్యలకు పాల్పడినట్లు అధికారులు తెలిపారు. ఈ ఉల్లంఘనల కారణంగానే ఏడు హోటళ్ల లైసెన్సులను సస్పెండ్‌ చేశారు.
ఈ తనిఖీలు తెలంగాణలోని రెస్టారెంట్లు, హోటళ్లలో ఆహార భద్రత ప్రమాణాలను మెరుగుపరచాల్సిన ఆవశ్యకతను నొక్కి చెబుతున్నాయి. ప్రజలు తినే ఆహారం సురక్షితంగా, పరిశుభ్రంగా ఉండేలా చూడటం ప్రభుత్వ బాధ్యత.