అమెరికా హోంల్యాండ్ సెక్యూరిటీ శాఖ (డీహెచ్‌ఎస్) ప్రతిపాదించిన మూడు వీసా నిబంధనలపై ప్రజాభిప్రాయ సేకరణ గడువు వచ్చే వారం ముగుస్తుంది. ఇవి ఇంకా ప్రతిపాదనలే, చట్టాలు కాలేదు. ప్రస్తుతం 60 రోజుల గ్రేస్ పీరియడ్ అమల్లోనే ఉంది.
1. ఓపీటీ ఫీజు (గడువు నవంబర్ 9)
అక్టోబర్ 8న ఫెడరల్ రిజిస్టర్‌లో ప్రచురితమైంది. విద్యార్థి మొదటి ఓపీటీ సిఫార్సుకు $70,000, తర్వాత ప్రతి సిఫార్సుకు $30,000 ఫీజు ప్రతిపాదించారు. ఈ ఫీజును విద్యాసంస్థ చెల్లించాలి; ఆ భారాన్ని విద్యార్థులపై వేసే అవకాశం ఉంది. స్టెమ్ ఓపీటీని కూడా తర్వాతి సిఫార్సుగానే లెక్కిస్తారని ఎఫ్1జాబ్స్ పేర్కొంది.
2. 60 రోజుల గ్రేస్ పీరియడ్ రద్దు (గడువు నవంబర్ 10)
సెప్టెంబర్ 11న ప్రచురితమైంది. ఉద్యోగం పోయిన తర్వాత కొత్త ఉద్యోగం వెతుక్కోవడానికి హెచ్-1బీ, హెచ్-1బీ1, ఎల్-1, ఓ-1, టీఎన్, ఈ వీసాదారులు, వారి కుటుంబ సభ్యులకు ఉన్న 60 రోజుల గడువును ఎత్తివేయాలని ప్రతిపాదన. అమలైతే ఉద్యోగం ముగిసిన మరుసటి రోజే వీసా హోదా పోతుంది.
3. గత ఆమోదాలకు ప్రాధాన్యం తొలగింపు (గడువు నవంబర్ 13)
అక్టోబర్ 14న ప్రచురితమైంది. అవే వివరాలతో వచ్చే పొడిగింపు దరఖాస్తుల్లో గతంలో ఇచ్చిన ఆమోదాన్ని పరిగణించే విధానాన్ని యూఎస్‌సీఐఎస్ ఆపేయాలని ప్రతిపాదన. దీంతో అదనపు ఆధారాల కోసం అడిగే నోటీసులు పెరుగుతాయని అంచనా.
నవంబర్ 1 నాటికి గ్రేస్ పీరియడ్ ప్రతిపాదనపై సుమారు 27,000, ఓపీటీ ఫీజుపై 4,793, మూడో ప్రతిపాదనపై సుమారు 400 అభిప్రాయాలు వచ్చాయని ఎఫ్1జాబ్స్ పేర్కొంది. 2024 ఆర్థిక సంవత్సరంలో ఆమోదం పొందిన సుమారు 3.99 లక్షల హెచ్-1బీ దరఖాస్తుల్లో 71% భారత్‌లో పుట్టినవారివేనని రెమ్యునెన్స్ పేర్కొంది.
