జోగుళాంబ గద్వాల జిల్లాలో పోలీసుల వేధింపులకు గురైన ఓ యువకుడు ఆత్మహత్య చేసుకున్న ఘటన తీవ్ర కలకలం రేపింది. ధరూర్‌ మండలం బూరెడ్డిపల్లికి చెందిన కుర్వ వీరేశ్‌ (28) అనే యువకుడు పోలీసుల అకారణ దాడి, డబ్బుల వసూలుతో మనస్తాపం చెంది పురుగులమందు తాగి బలవన్మరణానికి పాల్పడ్డాడు.
గతంలో సర్పంచ్‌ అభ్యర్థిగా పోటీ చేసిన వీరేశ్‌ను ఇటీవల ఓ కేసు విషయమై ఎస్సై, పోలీసులు స్టేషన్‌కు పిలిచారు. అక్కడ అకారణంగా దాడి చేసి, డబ్బులు లాక్కున్నారని వీరేశ్‌ ఆరోపించాడు.
తాను ఎలాంటి తప్పు చేయకపోయినా పోలీసులు తనను హింసించారని, ఈ అవమానాన్ని భరించలేకపోయానని వీరేశ్‌ సోషల్‌ మీడియా వేదికగా తన ఆవేదనను వ్యక్తం చేశాడు. ఈ పోస్ట్‌ చేసిన నాలుగు రోజుల తర్వాత అతను పురుగులమందు తాగాడు.
ఈ ఘటనపై బీఆర్‌ఎస్‌ పార్టీ నాయకులు, వివిధ ప్రజాసంఘాలు తీవ్ర ఆగ్రహం వ్యక్తం చేశాయి. వీరేశ్‌ మృతికి న్యాయం చేయాలని డిమాండ్‌ చేస్తూ గద్వాలలో పెద్ద ఎత్తున ధర్నా నిర్వహించాయి.
పోలీసుల తీరుపై ప్రజల్లో తీవ్ర వ్యతిరేకత వ్యక్తమవుతోంది. ఇలాంటి ఘటనలు పునరావృతం కాకుండా ప్రభుత్వం తక్షణమే చర్యలు తీసుకోవాలని ప్రజలు కోరుతున్నారు.