హైదరాబాద్‌లోని రవీంద్రభారతిలో శుక్రవారం ‘దర్పణ స్వరాలు’ కవితా సంకలనం ఆవిష్కరణ జరిగింది. దర్పణం సాహిత్య వేదిక, మేడ్చల్‌–మల్కాజిగిరి జిల్లా సాహిత్య వేదిక ఈ కార్యక్రమాన్ని సంయుక్తంగా నిర్వహించాయి.
తెలంగాణ భాషా సాంస్కృతిక శాఖ సంచాలకుడు డా. ఏనుగు నరసింహారెడ్డి ఈ కవితా సంకలనాన్ని ఆవిష్కరించారు. కాళోజీ పురస్కార గ్రహీత, ప్రముఖ కవి డా. అమ్మంగి వేణుగోపాల్‌తో కలిసి ఆయన ఆవిష్కరణలో పాల్గొన్నారు.
కవులు నిరంతరం అధ్యయనం చేస్తూ సాహిత్యరంగంలో వస్తున్న నూతన పోకడలను అవగాహన చేసుకోవాలని డా. ఏనుగు నరసింహారెడ్డి సూచించారు. కొత్త కవులను ప్రోత్సహిస్తున్న దర్పణం సాహిత్య వేదికను ఆయన అభినందించారు.
ఈ కార్యక్రమం తెలంగాణ భాషా సాంస్కృతిక శాఖ సౌజన్యంతో జరిగింది. దర్పణం సాహిత్య వేదిక అధ్యక్షుడు డా. పవన్ చంద్రగిరి ఈ కార్యక్రమానికి అధ్యక్షత వహించారు.
