దసరా పండుగ సందర్భంగా హైదరాబాద్ నుంచి సొంతూళ్లకు వెళ్లే ప్రయాణికులతో నగరంలోని ప్రధాన రహదారులపై వాహనాల రద్దీ పెరిగింది. ఆర్టీసీ బస్సులు, ప్రైవేట్ ట్రావెల్స్ వాహనాలు, సొంత కార్లు, బైకులతో రోడ్లు నిండిపోయాయి.
ముఖ్యంగా మియాపూర్ నుంచి బాలానగర్ వై జంక్షన్ వరకు ట్రాఫిక్ పూర్తిగా నిలిచిపోయింది. వాహనాలు నెమ్మదిగా కదలడంతో ప్రయాణికులు తీవ్ర ఇబ్బందులు ఎదుర్కొన్నారు.
కుటుంబంతో కలిసి పండుగను ఆనందంగా జరుపుకోవడానికి నగరవాసులు పల్లెబాట పట్టారు. ఈ కారణంగా నగరంలో వాహనాల సంఖ్య అనూహ్యంగా పెరిగింది.
ప్రధాన రహదారులపై వాహనాల రద్దీ పెరగడంతో ట్రాఫిక్ నియంత్రణకు పోలీసులు చర్యలు తీసుకున్నారు. అయినప్పటికీ రద్దీని తగ్గించడం కష్టమైంది.
