గ్రేటర్ హైదరాబాద్ పరిధిలో వాహనాలను శుభ్రం చేయడానికి ప్రతిరోజూ 20 కోట్ల లీటర్ల నీరు వృథా అవుతోంది. నగరంలో నీటి కొరత ఉన్నప్పటికీ, వాహనాలకు వాటర్ వాష్ లు యథేచ్ఛగా జరుగుతున్నాయి.
ప్రస్తుతం గ్రేటర్ హైదరాబాద్ లో 95 లక్షలకు పైగా వివిధ రకాల వాహనాలు ఉన్నాయి. వీటిలో 65 లక్షల ద్విచక్ర వాహనాలు, 16 లక్షలకు పైగా కార్లు, లారీలు, ఇతర రవాణా వాహనాలు, సిటీ ఆర్టీసీ, ప్రైవేట్ బస్సులు లక్షల్లో ఉన్నాయి.
పెరుగుతున్న వాహనాల సంఖ్యకు అనుగుణంగా నగరంలో వాటర్ సర్వీసింగ్ కేంద్రాలు విస్తరిస్తున్నాయి. ప్రస్తుతం నగరం అంతటా 3 వేల నుంచి 5 వేల వరకు ఆటోమొబైల్ సర్వీసింగ్ సెంటర్లు, కార్, బైక్ వాషింగ్ స్టేషన్లు ఉన్నాయి.
స్టీమ్ వాషింగ్, వాటర్ లెస్, డ్రై వాష్ వంటి ఆధునిక పద్ధతులు అందుబాటులో ఉన్నప్పటికీ, సర్వీసింగ్ సెంటర్లు వాటిని అప్‌డేట్ చేసుకోవడం లేదు. వాహనదారులు కూడా తమ ఆలోచనా విధానంలో మార్పు తెచ్చుకోవాలని నిపుణులు సూచిస్తున్నారు.
