కుమామోటో (జపాన్): కుమామోటో మాస్టర్స్ జపాన్ బ్యాడ్మింటన్ టోర్నీలో తెలుగు షట్లర్లు బుధవారం కీలక మ్యాచ్‌లు ఆడనున్నారు. మాజీ ప్రపంచ నంబర్ వన్, ఆంధ్రప్రదేశ్‌కు చెందిన కిదాంబి శ్రీకాంత్ పురుషుల సింగిల్స్ తొలి రౌండ్‌లో డెన్మార్క్ ఆటగాడు రాస్మస్ గెమ్కేతో తలపడతారు. 5 లక్షల డాలర్ల ప్రైజ్‌మనీ ఉన్న ఈ సూపర్ 500 టోర్నీ నవంబర్ 10 నుంచి 15 వరకు జరుగుతుంది.
మహిళల డబుల్స్‌లో గాయత్రి గోపీచంద్, ట్రీసా జాలీ జోడీ మంగళవారం జపాన్ జంట హినాటా సుజుకి–నావో యమకితాపై 21-17, 21-14తో 42 నిమిషాల్లో గెలిచి ప్రీక్వార్టర్స్‌కు చేరింది. తర్వాతి రౌండ్‌లో జపాన్‌కే చెందిన రిన్ ఇవనాగ–కీ నకనిషి జోడీతో తలపడనుంది.
ఇతర భారతీయుల సంగతి
- ఎనిమిదో సీడ్ లక్ష్య సేన్ తొలి రౌండ్‌లో చైనీస్ తైపీ ఆటగాడు చి యు జెన్‌తో
- మలేసియా జోడీ ఆరోన్ చియా–సో వూయి యిక్ గాయంతో తప్పుకోవడంతో హరిహరన్–అర్జున్ ముందంజ
- మిక్స్‌డ్ క్వాలిఫయింగ్‌లో ధ్రువ్ కపిల–రాధిక శర్మ ఓటమి
డిసెంబర్ 9 నుంచి 13 వరకు చైనాలోని హాంగ్‌జౌలో జరిగే బీడబ్ల్యూఎఫ్ వరల్డ్ టూర్ ఫైనల్స్‌కు పీవీ సింధు ఇప్పటికే అర్హత సాధించారు. ఈ సీజన్ ముగింపు టోర్నీకి అర్హత కోసం మిగతా భారతీయులకు కుమామోటో, వచ్చే వారం హాంకాంగ్ ఓపెన్ కీలకం.
