కుమామోటో (జపాన్): భారత బ్యాడ్మింటన్ డబుల్స్ జోడీ సాత్విక్‌సాయిరాజ్ రంకిరెడ్డి–చిరాగ్ శెట్టి కుమామోటో మాస్టర్స్ జపాన్ సూపర్ 500 టోర్నీ నుంచి వైదొలిగారు. డ్రాలో పేరు ఉన్నప్పటికీ బరిలోకి దిగలేదు. వైదొలగడానికి కారణాన్ని ఇంకా వెల్లడించలేదు. ఆరో సీడ్‌గా బరిలోకి దిగాల్సిన ఈ జోడీ తొలి రౌండ్‌లో చైనాకు చెందిన ఐదో సీడ్ వాంగ్ చాంగ్–షీ హావోనాన్‌తో తలపడాల్సి ఉంది.
వరల్డ్ టూర్ ఫైనల్స్ అర్హత రేసు సాగుతున్న సమయంలో ఈ ఉపసంహరణ చోటుచేసుకుంది. సీజన్ ముగింపు టోర్నీ డిసెంబర్ 9 నుంచి 13 వరకు చైనాలో జరుగుతుంది. రేసులో సాత్విక్–చిరాగ్ 58,550 పాయింట్లతో 12వ స్థానంలో ఉన్నారు. టాప్ 8 జోడీలకే అర్హత లభిస్తుంది. ఒక దేశం నుంచి గరిష్ఠంగా రెండు జోడీలకే అవకాశం ఉంటుంది.
టోర్నీలో ఇతర భారతీయులు
- మహిళల డబుల్స్‌లో గాయత్రి గోపీచంద్–ట్రీసా జాలీ ప్రీ క్వార్టర్స్‌కు; తదుపరి జపాన్ జోడీ రిన్ ఇవనాగా–కీ నకానిషితో పోరు
- పురుషుల డబుల్స్‌లో మూడో సీడ్ ఆరోన్ చియా–సో వూయి యిక్ గాయంతో మధ్యలో తప్పుకోవడంతో హరిహరన్–అర్జున్ ముందంజ
- పురుషుల సింగిల్స్ తొలి రౌండ్‌లో కిడాంబి శ్రీకాంత్ బుధవారం డెన్మార్క్ ఆటగాడు రాస్మస్ గెమ్కేతో తలపడుతున్నారు
అమలాపురానికి చెందిన సాత్విక్, చిరాగ్‌తో కలిసి ఈ ఏడాది సింగపూర్ ఓపెన్ టైటిల్ గెలిచారు. వచ్చే వారం హాంకాంగ్ ఓపెన్ సూపర్ 500 జరగనుంది. ఆ టోర్నీలో ఈ జోడీ ఆడుతుందా అన్నది ఇంకా స్పష్టం కాలేదు.
